19 верасня падведзены вынікі конкурсу прафесійнага майстэрства па актуалізацыі і папулярызацыі этнаграфічнай спадчыны сярод клубных работнікаў ДУК «ЦКС Краснапольскага раёна»
Гэты конкурс пад назвай «Шануй сляды мінулага» з перыядычнасцю раз у два гады ўжо не ўпершыню ўключае іх у новыя творчыя пошукі, актывізуе дзейнасць на базе этнакуткоў (этнахатак), якія створаны ў кожнай сельскай клубнай установе ДУК «ЦКС Краснапольскага раёна».
Палажэнне конкурсу носіць дынамічны характар: у адзін год галоўнай умовай з’яўляецца дэманстрацыя вопыту ў адкрытым рэжыме, правядзенне мерапрыемстваў; у другі – якасць метадычнай распрацоўкі, ацэнка якасці метадычных матэрыялаў (метадычная папка), выкарыстаных у рабоце, вядзенне дакументацыі, фотасправаздача. Такім чынам, дасягаюцца асноўныя мэты і задачы конкурсу, галоўныя з якіх – актывізацыя дзейнасці, узбагачэнне і засваенне новых форм работы, выяўленне станоўчага вопыту і яго распаўсюджванне, выяўленне праблем і прыняцце мер па іх рашэнню.
Значную ролю ў арганізацыі дзейнасці этнахатак (этнакуткоў) клубных устаноў адыгрываюць такія кампаненты, як збіральная (экспедыцыйная) практыка, валоданне методыкамі розных форм работы па актуалізацыі і папулярызацыі этнаграфічнай спадчыны, пастаяннае павышэнне метадычнага ўзроўню клубных работнікаў. Конкурс «Шануй сляды мінулага» – важная частка такой сістэмнай метадычнай вучобы кадраў.
У ходзе конкурсу і па яго выніках метадыстам па традыцыйнай культуры РЦК Марчанка В. А. абагульнены вопыт работы і выдадзена ілюстраваная брашура «Жывая нітка традыцый». Каштоўнасць гэтай работы у тым, што ў ёй раскрываецца і вопыт арганізацыі сістэмнай метадычнай вучобы кадраў клубных устаноў па дадзенаму напрамку, і вопыт арганізацыі працэсу захавання, актуалізацыі і папулярызацыі традыцыйнай культуры, этнаграфічнай спадчыны малой радзімы праз дзейнасць, арганізаваную клубнымі ўстановамі, на аснове сабранага ў сваёй мясцовасці этнаграфічнага багацця. А яшчэ ў брашуры змяшчаецца дадатак, у якім канкрэтныя метадычныя распрацоўкі з вопыту работы для скарыстання іх у практыцы клубных устаноў.
Трэба дадаць, што ў дапамогу клубным работнікам метадыстам РЦК па дадзенаму напрамку дзейнасці створаны добры метадычны фонд, у які ўваходзяць метадычныя дапаможнікі, распрацоўкі, сцэнарыі, даследчыя работы, рэкамендацыі і інш; рэгулярна праводзяцца выстаўкі і прэзентацыі гэтай выдавецкай літаратуры.
Валянціна Марчанка, метадыст 1-й катэгорыі РЦК ДУК «Цэнтралізаваная клубная сістэма Краснапольскага раёна»
