Крычаўскі раён прадставіў свае таленты на абласным фестывалі народнай творчасці “Беларусь родная, музычная, народная”
Фестываль народнай творчасці “Беларусь родная, музычная, народная” працягвае знаёміць магіляўчан з культурным, гістарычным, турыстычным багаццем раёнаў Магілёўскай вобласці. Магілёў ужо наведала 12 раёнаў. 18 мая эстафету прыняў Крычаўскі раён.
Творчая прэзентацыя размясцілася на некалькіх пляцоўках Магілёўскага абласнога метадычнага цэнтра народнай творчасці і культурна-асветнай работы.
Першай пляцоўкай стала фае ўстановы, тут працавала выстава дэкаратыўна-прыкладнога і выяўленчага мастацтва, на якой можна было ўбачыць цікавыя тэкстыльныя лялькі, жывапісныя карціны, вышытыя ручнікі, вытанчаныя вырабы з гліны, знакамітыя крычаўскія гліняныя свістулькі і многае іншае.
Для кожнага зацікаўленага крычаўскую свістульку прэзентаваў народны майстар Якавенка Вячаслаў Мікалаевіч, разнастайныя вырабы з гліны прадставіў Масіха Сяргей Мікалаевіч, член ГА “Беларускі Саюз майстроў народнай творчасці”, майстар-клас па выцінанцы прэзентавала Бернадская Наталля Мікалаеўна, народны майстар, член ГА “Беларускі Саюз майстроў народнай творчасці”. Працавала фотазона гістарычнага музея г. Крычава, выстаўка карцін навучэнцаў ДУА “Дзіцячая школа мастацтваў №1 г. Крычава”. Майстар-клас “Паперкрафт” правёў Алёнкін Дзмітрый Леанідавіч, настаўнік вышэйшай кваліфікаванай катэгорыі ДУА “Дзіцячая школа мастацтваў №1 г. Крычава”, а таксама работы ў гэтым напрамку былі прадстаўлены на выставе. Народны ансамбль цымбалістаў “Славяначка” ДУА “Дзіцячая школа мастацтваў №1 г. Крычава” падарыў усім прысутным музычны настрой.
Асноўнае мерапрыемства прайшло традыцыйна ў канцэртнай зале, дзе найлепшыя творчыя калектывы і салісты Крычаўскага раёна падарылі магілёўскаму гледачу насычаную канцэртную праграму.
Пачалася канцэртная праграма музычнай кампазіцыяй “Мы – Беларусы”, якая адлюстроўвала тэму пераемнасці пакаленняў і якую выканалі ўдзельнікі народнага хору ветэранаў, народнага вакальнага ансамбля “Вітанне”, узорнага вакальнага народнага ансамбля “Вашчылкі”.
На працягу канцэрта падымаліся тэмы пра малую радзіму, напрыклад у музычна-тэатралізаванай кампазіцыі “Песня пра Крычаў” або ў літаратурна-музычнай кампазіцыі “Беларуская зямля”. Тэма Вялікай Айчыннай вайны была ўзнята ў інсцэніроўцы ўрыўка аповесці Б. Васільева “А зоры тут ціхія”, якую выканалі ўдзельнікі аматарскага аб’яднання “ПАТРЫЁТ” раённага Цэнтра культуры. Душэўнымі былі аўтарскія прыпеўкі ў выкананні Надзеі Міхайлаўны Ільянкавай.
Сваёй творчасцю і добрым настроем з гасцямі дзяліліся ўзорны харэаграфічны калектыў “ЭЛЬ-ГАТО”, узорны харэаграфічны ансамбль “Мара”, інструментальны ансамбль “Лірычная мелодыя”, узорны харэаграфічны калектыў “ІНСАЙТ” дзіцячай школы мастацтваў, вакальны ансамбль вакальны ансамбль “Крыніца” Сакольніцкага дома культуры і іншыя.
“2023 год аб’яўлены годам міру і стварэння, і таму мы ўсім беларусам жадаем, міру і шчасця кожнаму дому, міра і шчасця беларускай зямлі. Роднай! Музычнай! Народнай!” – такімі словамі скончылася творчая прэзентацыя Крычаўскага раёна. А наступным у межах абласнога фестывалю народнай творчасці “Беларусь родная, музычная. народная” выступіць Хоцімскі раён.
Крысціна Башарымава, вядучы рэдактар УК “Магілёўскі абласны метадычны цэнтр НТ і КАР”
