Майстры Магілёўшчыны прынялі ўдзел у Х Рэспубліканскі фестывалі-кірмашы народных мастацкіх рамёстваў «Вясновы букет»
26 мая ў г.Мінску адбыўся Х Рэспубліканскі фестываль-кірмаш народных мастацкіх рамёстваў «Вясновы букет». Арганізатарамі фестывалю з’яўляюцца Міністэрства культуры Рэспублікі Беларусь, Мінскі гарадскі выканаўчы камітэт, Беларускі саюз майстроў народнай творчасці.
Магілёўскую вобласць на свяце прадстаўлялі звыш 40 майстроў народных мастацкіх рамёстваў з Бабруйскага, Бялыніцкага, Быхаўскага, Глускага, Горацкага, Дрыбінскага, Кіраўскага, Краснапольскага, Круглянскага, Крычаўскага, Асіповіцкага, Слаўгарадскага, Хоцімскага раёнаў, гг. Магілёва і Бабруйска. Музычнае суправаджэнне забяспечваў народны вакальны ансамбль «Журавушка» Сасноўскага сельскага клуба дзяржаўнай установы культуры «Цэнтралізаваная клубная сістэма Асіповіцкага раёна», які выступаў на цэнтральнай канцэртнай пляцоўцы, а таксама каля тэрыторыі выставак свайго рэгіёна.
Падчас правядзення мерапрыемства майстры народных мастацкіх рамёстваў дэманстравалі калекцыі творчых работ у рамках выставы-продажу, а таксама праводзілі майстар-класы і дэманстрацыю творчых працэсаў.
Па выніках Х Рэспубліканскага фестывалю-кірмашу народных мастацкіх рамёстваў «Вясновы букет» былі адзначаны: дыпломам за лепшую калекцыю выставачных работ – дзяржаўная ўстанова адукацыі «Дзіцячая школа мастацкіх рамёстваў і мастацтваў г.Быхава», Дом рамёстваў дзяржаўнай установы культуры «Цэнтралізаваная клубная сістэма Горацкага раёна», Кароўчынскі Дом рамёстваў дзяржаўнай установы культуры «Цэнтралізаваная клубная сістэма Дрыбінскага раёна», а таксама дыпломам як самая маладая вышывальшчыца фестываля ўзнагароджана Чычылейчык Алена, удзельніца клуба аматараў традыцыйнага рукадзелля Вяззеўскага СДК дзяржаўнай установы культуры «Цэнтралізаваная клубная сістэма Асіповіцкага раёна».
Віншуем нашых майстроў і жадаем новых дасягненняў!
