Традыцыйна ў Галавенчыцах Чавускага раёна на Благавешчанне 7 красавіка гукаюць вясну
Як і заўсёды, на месцы правядзення абрадавай праграмы “Гуканне вясны” сабралося нямала прысутных: удзельнікі народнага ансамбля народнай музыкі і песні “Землякі” раённага Цэнтра культуры і вольнага часу, удзельніца аўтэнтычнага фальклорнага ансамбля “Незабудкі” Людміла Сцяпанаўна Каханоўская, работнікі культурна-спартыўнага цэнтра аграгарадка Вусце, Вусцянскай сельскай бібліятэкі, вучні сярэдняй школы №1 – удзельнікі гуртка спартыўнага танца “Черлидер” раённага Цэнтра культуры і вольнага часу, вучні абласной спартыўнай школы, а таксама жыхары вёскі сталі ўдзельнікамі гэтых святочных дзеянняў.
Пачалася праграма, як і раней праводзілі носьбіты традыцыйнай культуры вёскі Галавенчыцы, з развешваннем птушак на дрэвы, а затым па наваколлі панесліся загукальныя спевы “Благаславі, Божа, Прачыстая Маці, нам вясну гукаці, нам вясну гукаці…” у выкананні Людмілы Сцяпанаўны Каханоўскай і “Землякоў”. А далей – карагоды-гульні з усімі ўдзельнікамі свята “Па беражку” і “А мы просу сеялі”. Адметным у свяце стала падкідванне печаных птушак на абрусе з загукальнымі словамі. Для дзяцей былі праведзены традыцыйныя гульні в. Галавенчыцы “Дзежка”, “Кумкі-галубкі”, “Гарлачы”.
Мясцоваму стылю песеннай, танцавальнай і народна-апавядальнай лакальнай традыцыі міжрэчча Сожа і Проні калектыва в. Галавенчыцы нададзен статус нематэрыяльнай гісторыка-культурнай каштоўнасці Рэспублікі Беларусь. Таму галоўная мэта клубных работнікаў паспрыяць перадачы гэтых каштоўнасцей маладому пакаленню.
Алеся Далецкая, загадчык аддзела традыцыйнага мастацтва і рамёстваў РЦКіВЧ ДУК “ЦКС Чавускага раёна”
