VIII рэгіянальны фестываль народнай творчасці, народных промыслаў і рамёстваў «Дрыбінскія таржкі» прайшоў у Дрыбіне
З 16 па 18 жніўня невялікі гарадскі пасёлак пад назвай Дрыбін з усёй шчырасцю прымаў гасцей восьмага рэгіянальнага фестывалю народнай творчасці, народных промыслаў і рамёстваў «Дрыбінскія таржкі».
Першы раз сустракалі ўсіх удзельнікаў і гасцей гаспадары фестывалю – Дрыбша і Сымоніха, вобраз якіх адлюстраваны ў трохмятровых саламяных скульптурах, якія былі размешчаны ў цэнтральнай частцы Дрыбіна. Дрыбша – сардэчны і гасцінны гаспадар фестывалю, Сымоніха – яго несменная памочніца, якая заўсёды рада падтрымаць гутарку. Кожная скульптура распісаная яркімі фарбамі. Беларускія касцюмы фігур зроблены з ільняных ручнікоў, галаўныя ўборы – з кардона, упрыгожанага кветкамі.
Галоўная асаблівасць правядзення фестывалю ў 2018 годзе — трохдзённы фармат.
16 жніўня на цэнтральнай плошчы раённага Цэнтра культуры прайшла канцэртная праграма «На кірмашы» з удзелам народнага ансамбля народнай песні «Дзянніца» (РЦК) і народнага ансамбля народнай песні «Вярбіца» (Раснянски СДК). Артысты праспявалі знаёмыя ўсім беларускія і рускія народныя песні.
17 жніўня на стадыёне Дрыбінскай СШ адбыўся таварыскі матч па футболе сярод удзельнікаў групы «Днепр STARS» і кіраўнікоў арганізацый Дрыбінскага раёна, а вечарам удзельнікі групы правялі святочны канцэрт.
Галоўны дзень фестывалю — заключны — сабраў больш за тысячу гасцей. 18 жніўня калектывы традыцыйна сустракалі на «мытне», дзе кожны прайшоў «фэйс-кантроль», праявіў сваю моц ў дачкі каваля Агрыпіны, праехаў праз шлагбаўм на спецыяльным транспарце і пакаштаваў мясцовых прысмакаў.
У 12.00 удзельнікі і госці фестывалю прынялі ўдзел у святочным шэсці. Маляўнічай калонай яны прайшлі да галоўнай сцэны, дзе адбылося адкрыццё фестывалю. Кожны з запрошаных калектываў падзяліўся сваёй творчасцю, выступаючы на сцэне, цешачы гледачоў сваім каларытам, прывезеным з розных куткоў нашай краіны і суседняй Расіі.
Таксама ў рамках фестывалю прайшоў агляд-конкурс таржковых падворкаў, дзе сябе творча прэзентавалі арганізацыі, установы і прадпрыемствы раёна. Званне «Лепшае падвор’е» дасталася УКП «Жылкамгас». Другое месца заняло падвор'е «Сельскія саветы». Трэці вынік у «Дрыбінрайаграпрамтэхзаб». Пераможцы конкурсу і пераможцы ў намінацыях былі ўзнагароджаны дыпломамі і прызамі.
На фестывалі яркасцю і разнастайнасцю вабіў кожнага Горад майстроў. На свята прыехалі майстры з Беларусі і Расіі. Шапавальства, лапцепляценне, ганчарства, вышыўка, бондарства, разьба па дрэве, ткацтва — на майстар-класах паспрабавалі сябе ўсе жадаючыя.
Усе, хто прыйшоў на фестываль, смаглі ацаніць мясцовыя крамніцы. Прадукцыя амаль уся мясцовая, ад гаспадарак Дрыбінскага раёна. Выбар — на любы густ і кашалёк. «Шалёная пчолка» прапаноўвала мёд і мядовыя прысмакі, крамніца «Селядцоў» радавала асартыментам рыбных страў. Побач у крамніцы «Зёлак» прадавалі лекавыя травы, гаючыя венікі і чай. Крыху далей — крынічную ваду, стравы нацыянальнай кухні, свежы хлеб. Разнастайны асартымент быў прадстаўлены клубам аматараў у крамніцы «Карэльская кухня», якая дзейнічае другі раз на фестывалі.
Увечары на святочным канцэрце выступілі салісты раённага Цэнтра культуры і чароўная госця фестывалю – Вольга Плотнікава. Фаер-шоу і святочны салют сталі выдатным завяршэннем восьмага рэгіянальнага фестывалю народнай творчасці, народных промыслаў і рамёстваў «Дрыбінскія таржкі».
Н.А.Шуткова, культарганизатар РЦК ДУК «Дрыбінская цэнтралізаваная клубная сістэма»
