Заслужаны аматарскі калектыў Рэспублікі Беларусь ансамбль народнай музыкі і песні «Жытніца» Арэхаўскага сельскага Дома культуры даў канцэрт «З любоўю да малой радзімы» ў Клічаўскім раённым Доме культуры
18 снежня, ў аўторак, Заслужаны аматарскі калектыў Рэспублікі Беларусь ансамбль народнай музыкі і песні «Жытніца» Арэхаўскага сельскага Дома культуры даў двухгадзінны сольны канцэрт «З любоўю да малой радзімы» ў Клічаўскім раённым Доме культуры.
На сцэне жыла сама беларускасць! Родная матчына песня, беларускія нацыянальныя строі, багатае сугучча рознагалосся, цудоўная інструментальная музыка (скрыпкі, цымбалы, каннэл, жалейкі, бубен, баян, бас-балалайка) – гэта была сапраўдная феерыя! Артысты выбралі для канцэрта лепшае са свайго рэпертуару і вельмі стараліся пакарыць гледача. А выступаць перед землякамі – самая цяжкая справа. Бо з біблейскіх часоў вядома: «Няма прарока ў сваёй Айчыне…».
Але «Жытніца» здолела «разагрэць» залу і пакарыць сэрцы клічаўлян. Яны горача апладзіравалі, спявалі разам, на «Кравяк» і патанчыць выйшлі. Сольныя класічныя скрыпічныя нумары ў выканні Уладзіміра і Арцёма Вааксаў, прафесійных музыкантаў-віртуозаў, душу ўзвышалі, ачышчалі яе і немагчыма было саўладаць з багаццем пачуццяў, што дарыла гэта музыка, таму слёзы стаялі ў вачах многіх людзей. А колькі эмоцый выклікалі спевы а капэла духоўнага песнапення, твора, напісанага іераманахам Раманам! Вось гэта выхаванне пачуццяў!
Ансамбль «Жытніца» ў прадстаўленні не мае патрэбу. Ён – візітка Клічаўшчыны на нацыянальных культурных форумах і ў Беларусі, і па-за яе межамі. У калектыва вялікая, ужо ў 27 гадоў, творчая біяграфія. Кожны ўдзельнік – Талент. У складзе ансамбля настаўнікі Арэхаўскай ДШМ Вольга Канстанцінаўна Дымава (цымбалы), Наталля Яўгенаўна Міхнёнак (баян), Наталля Мікалаеўна Полаз (спявачка), настаўнік Нясяцкага філіяла Арэхаўскай ДШМ Аляксандр Людвігавіч Каўшырка (бас-балалайка), салістка Тамара Аляксееўна Чэрнік, якую калегі называюць залатым голасам Арэхаўкі.
Касцяк «Жытніцы» – сем’я Вааксаў, прафесійныя музыканты: Уладзімір Георгіевіч Ваакс, начальнік аддзела ідэалагічнай работы, культуры і па справах моладзі (скрыпка), Алена Міхайлаўна – дырэктар ДУА «Арэхаўская дзіцячая школа мастацтваў» (мастацкі кіраўнік, салістка-вакалістка калектыву, вядучая праграм), старэйшы сын Арцём – настаўнік Арэхаўскай ДШМ (скрыпка). Малодшы сын Георгій – яшчэ старшакласнік, які «вырас» на сцэне, грае на розных інструментах, у тым ліку ўдарных, скрыпцы.
Шчырае дзякуй, «Жытніца»! Брава! Жадаем табе новых здабыткаў, натхнення і яркіх творчых знаходак!
