2 верасня на Краснапольшчыне прайшло мерапрыемства да дня беларускага пісьменства “Скарбы роднай зямлі”
Калі мы далучаемся да святыняў свайго народа, яго культурных каштоўнасцяў, да вытокаў народнай мудрасці, мы садзейнічаем яднанню людзей, іх духоўнаму ўзбагачэнню, умацаванню сувязі пакаленняў.
Менавіта на гэта было накіравана мерапрыемства “Скарбы зямлі Беларусі”, арганізаванае народным паэтычным аб’яднаннем “Світанак” Краснапольскага РЦК і прысвечанае Дню беларускага пісьменства.
На яго былі запрошаны спецыялісты клубнай і бібліятэчнай сістэм, супрацоўнікі музея, музычнай школы, рэдакцыі раённай газеты, наведвальнікі аддзялення пажылых людзей і жыхары раёна.
Аб’яднанне “Світанак” ужо не першы год ладзіць для зацікаўленых краснапальчан святочныя гасцёўні, насычаныя роднай мовай, мастацкім словам і ўшанаваннем тых, хто шмат зрабіў дзеля беларускай літаратуры, роднага слова і традыцыйнай нацыянальнай культуры.
Праграма гасцёўні “Скарбы зямлі Беларусі”, а менавіта ў такой форме зноў адбывалася свята, была прадстаўлена некалькімі модулямі.
Адзін з іх – гістарычны модуль “Напісанае застаецца”, прысвечаны тым, хто ўнёс вялікі ўклад у развіццё беларускага пісьменства, кнігадрукавання. Яскравай часткай гэтага модуля стала пастаноўка-дыялог па п’есе Алеся Петрашэвіча “Напісанае застаецца”, ролі ў якой выканалі П. Выганны (роль Скарыны) і М. Пугачоў (роль Нунцыя).
Краязнаўчы модуль “Краснапольшчына літаратурная” знаёміў з асобамі-землякамі, якія ўнеслі значны ўклад у развіццё беларускай літаратуры, пячатнага слова, публіцыстыкі. Прагучалі і творы некаторых паэтаў і пісьменнікаў з кагорты знакамітых землякоў, сярод якіх проза С. Кухарава, якая стала асновай роздуму аб духоўнасці, і песня “Краснаполле” па творчасці А. Пысіна ў выкананні ансамбля народнага клуба ветэранаў “Дабрыня”.
Творчы паэтычны модуль “Яднаюць мова нас і Беларусь” быў напоўнен разважаннем на зададзеную тэму і творамі сучасных аматараў слова Краснапольшчыны, членаў аб’яднання “Світанак” – Г. Яўсеенка, Г. Каваленка, В. Марчанка, С. Сыранкова. На ўзроўні сваіх твораў мясцовыя паэты-аматары зрабілі свята пісьменства сугучным з Днём народнага адзінства.
Упрыгожылі свята і напоўнілі яго духоўнасцю і музычныя творы ў выкананні салістаў РЦК А. Трафімавай і А. Дарафеева, і сустрэча з творамі і творцамі традыцыйнай культуры, якія былі прадстаўлены ў модулі “Народная культура – крыніца духоўнасці”, дзе лепшыя творы народнай творчасці прадставілі калектывы ДУК “ЦКС Краснапольскага раёна” і носьбіты фальклору – песеннага і музычнага. Народная творчасць заўсёды была і застаецца вызначальным кампанентам прыналежнасці чалавека да сваёй нацыі. З асаблівай цікаўнасцю былі ўспрыняты аўтэнтычныя народныя песні менавіта краснапольскай зямлі, якія прагучалі ў выкананні носьбітаў і пераймальнікаў фальклору Н. Яцутка, Н. Дударавай, Т. Яфімчык., Л. Вараб’ёвай, ансамбля народнага клуба “Дабрыня”. Самабытная творчасць носьбіта музычнай культуры Краснапольшчыны В.М.Саранкова была прадстаўлена праз відэаролік, як даніна павагі да гэтага чалавека і яго творчасці, бо таленавіты майстар ігры на гармоні, на жаль, несваечасова пайшоў з жыцця.
А яшчэ да свята былі падрыхтаваны тэматычныя фотазоны, багатыя слайд-прэзентацыі і выстаўкі: літаратуры – мастацкай і краязнаўчай, прадстаўленыя метадычным аддзелам РЦК і аб’яднаннем “Світанак”; народных рамёстваў і ДПМ, падрыхтаваныя РДР; карцін, напісаных В. Марчанка.
У гасцёўні былі падведзены і вынікі папярэдне праведзенай метадыстам па традыцыйнай культуры конкурснай краязнаўчай дыктоўкі “Нам засталася спадчына”. Яна была праведзена з работнікамі клубнай сістэмы з мэтай выяўлення ўзроўню інфармаванасці і ведаў у вобласці развіцця асветы, літаратуры, пісьменства, кнігадрукавання. Пераможцамі конкурснай дыктоўкі сталі Н. Паплыка, культарганізатар Пачапоўскага СДК, А. Трафімава, кіраўнік народнага ансамбля РЦК, Т. Яфімчык, загадчыца Яноўскага СДК, якія былі адзначаны дыпломамі III ступені.
“Каб заставацца ўнікальнымі, не страціць аблічча нацыі, трэба імкнуцца ўсімі сродкамі і сіламі захоўваць сваю мову, свае традыцыі і культуру, аддаючы даніну павагі сваім продкам. Сёння, святкуючы Дзень беларускага пісьменства на Краснапольшчыне, мы імкнуліся ўнесці свой унёсак у гэту пачэсную справу”, - адзначыла ў сваім звароце да прысутных кіраўнік народнага паэтычнага аб’яднання “Світанак”, арганізатар свята В. А. Марчанка.
У свяце прыняла ўдзел галоўны спецыяліст аддзела ідэалагічнай работы, культуры і па справах моладзі Краснапольскага райвыканкама М. В. Разгонава, якая з радасцю адзначыла тое, што ўдзел Краснапольшчыны ў святкаванні Дня беларускага пісьменства адбыўся на такім высокім узроўні, мерапрыемства атрымалася насычаным і па-сапраўднаму святочным, “дыхала духоўнасцю”. Марыя Віктараўна выказала шчырую падзяку арганізатарам і ўдзельнікам мерапрыемства за папулярызацыю лепшых традыцый нацыянальнай культуры Беларусі і сваёй малой радзімы, папулярызацыю роднага слова, духоўнасці і ідэй адзінства беларускага народа.
Валянціна Марчанка, метадыст РЦК ДУК “Цэнтралізаваная клубная сістэма Краснапольскага раёна”
