ДУК «Цэнтралізаваная клубная сістэма Асіповіцкага раёна» прадстаўляла Магілёўшчыну на ХI Рэспубліканскім фестывалі фальклорнага мастацтва “Берагіня”
24 ліпеня ў гарадскім пасёлку Акцябрскі, што на Гомельшчыне, адбыўся ХI рэспубліканскі фестываль фальклорнага мастацтва “Берагіня”, на якім у чарговы раз сваё творчае майстэрства дэманстравалі аматарскія калектывы з Пратасевіцкага сельскага Дома культуры дзяржаўнай установы культуры “Цэнтралізаваная клубная сістэма Асіповіцкага раёна”.
Народны ансамбль народнай песні і музыкі “Сузор’е” практыкуе розныя віды песенна-танцавальнай творчасці. Яны спыніліся на народных танцах, цікавых па сваёй сюжэтнасці. Да народных танцаў і песень сям’я Наталлі Еўдакімовіч – кіраўніка ансамбля, заўсёды адносілася з павагай. Продкі ўмелі добра спяваць і танчыць. Так што ўсе гэта багацце было перанята ад іх, і затым прыўнесена ў створаны калектыў. Кожны танец з адпаведнай экспрэсіяй і шэрагам рухаў, якія адточваліся-шліфаваліся не адзін год. Таму нясорамна было выйсці на сцэну і паспаборнічаць з іншымі танцавальнымі калектывамі, якіх было не адзін дзясятак. Канкурэнцыя насамрэч была вялікая. Аднак у некаторых намінацыях удалося дайсці да фіналу. Самае прыемнае, што Аляксандр Валанковіч і Дзіяна Шайко атрымалі дыплом лаўрэата ІІI ступені ў XV Рэспубліканскім конкурсе пар-выканаўцаў беларускіх народных побытавых парных танцаў “Лявоніха”. У намінацыі “ЗАЯЦ” ІІІ Рэспубліканскага конкурсу хараэграфічнай імправізацыі “БАРЫНЯ” Наталля Еўдакімовіч узнагароджана дыпломам лаўрэата ІІ ступені. Канкурсанты, якія не занялі прызавых месц, былі адзначаны дыпломамі ўдзельніка.
У рамках фестывалю пад час выставы-прэзентацыі “Традыцыi рэгiянальных фальклорных практык” раённым аддзелам народнай творчасці і культурна-асветнай работы былі прадстаўлены метадычныя матэрыялы, фота-альбомы, буклеты, якія адлюстроўвалі правядзенне раённага свята народных традыцый “Шчадроўкі”, раённых святаў “Масленіца”, “Купалле”, “Зажынкі”, “Дажынкі”, рэгіянальнага фестывалю народнай творчасці “Веснавыя колеры”, адкрытага фальклорнага фестывалю “Вытокі”, раённага фестывалю народных рамёстваў “Асіпоўшчына рамесная”. Тут жа можна было пазнаёміцца з творчасцю майстроў і рамеснікаў Асіпоўшчыны і набыць сувенірную прадукцыю.
Наталля Хамянок начальнік раённага аддзела народнай творчасці і культурна-асветнай работы ГУК “Цэнтралізаваная клубная сістэма Асіповіцкага раёна”
