СВЕТ, САТКАНЫ ДУШОЙ
Свет, сатканы душой, пазнавалі і адкрывалі для сябе тыя, хто трапіў на прэзентацыю новай кнігі мясцовай паэткі Краснапольшчыны Валянціны Марчанка.
Выхад кнігі – гэта вынік творчай дзейнасці, нястомнай работы душы аўтара. А яшчэ – гэта падарунак, і не толькі аўтару, але і ўсім аматарам слова і тым, хто хоча пазнаць сваю вялікую і малую радзіму і разам з аўтарам прызнацца роднай зямлі ў шчырай любові да яе. Бо кніга – гэта яшчэ і помнік, які захоўвае кожным сваім радком часцінку гісторыі, культуры, жыцця землякоў, адлюстроўвае падзеі і з’явы грамадства і акаляючага свету.
Паэтку хвалююць і захопліваюць розныя тэмы. Прыхільнікі яе творчасці ўжо змаглі ўпэўніцца ў гэтым па яе папярэдне выдадзеным кнігам – “Вам сваю завяшчаю любоў”, “Перламутровые росы”, “Скрыпкі маёй душы”, “Прыгарні ты да сэрца Радзіму”.
“Але ў першую чаргу мяне хвалююць тэмы вечныя і актуальныя. Немагчыма не адгукнуцца на падзеі, якія адбываюцца ў свеце і грамадстве, – гэта мая грамадзянская пазіцыя. Таму ў сваёй творчасці я звяртаюся да тэмы Радзімы, роднага краю, імкнуся ствараць радкі, якія дыхаюць патрыятызмам, любоўю да Радзімы, духоўнасцю. Гэта вечныя каштоўнасці, якія павінны быць уласцівы чалавечаму грамадству, народу, любой дзяржаве і краіне”, – падзялілася паэтка.
У свой пяты зборнік вершаў “Свет, сатканы душой” яна ўключыла новыя вершы і частку тых, што былі напісаны раней, бо тыраж апошняй кнігі “Прыгарні ты да сэрца Радзіму” хутка разыйшоўся, а прыхільнікаў творчасці сваёй зямлячкі і жадачых пазнаёміцца з яе вершамі, набыць кнігі становіцца ўсё больш.
Чытачам, якія ўжо знаёмыя з яе творчасцю будзе цікава пазнаёміцца і з новай кнігай і сярод знаёмых вершаў адшукаць новыя.
Яшчэ адной асаблівасцю кнігі з’яўляецца тое, што некаторыя з яе вершаў былі конкурснымі работамі, якія ўдзельнічалі ў Міжнародных літаратурных конкурсах, прычым паспяхова. Напрыклад, у кнізе можна знайсці верш, які ў конкурсе “Преодоление”, арганізаваным Гомельскім аддзяленнем Саюза пісьменнікаў Беларусі, заняў I месца. Другі з вершаў быў адзначаны дыпломам Гран-пры. А ў дзень прэзентацыі кнігі быў атрыманы яшчэ адзін дыплом – дыплом I ступені Міжнароднага конкурсу “Родина мая”.
У зборніку “Свет, сатканы душой” знайшлі пакліканне ідэі Года гістарычнай памяці і Года міру і стварэння. У кнізе – чатыры тэматычныя раздзелы: “Беларусь – наша маці, і яна ў нас адна”, “Не смейте Память хоронить”, “Я маленькай радзіме малюся”, “Пережитость в рифмах дышит”.
У час прэзентацыі кнігі гэтыя раздзелы былі раскрыты і прадстаўлены праз каментарыі аўтара, дыялогі з вядучымі, слайды і, канешне, праз чытанне вершаў у выкананні аўтара, калег, былых вучняў, аматараў яе паэзіі. Успрыманню вершаў дапамагала фонавая музыка.
Валянціна Аляксандраўна, з яе схільнасцю да імправізацый, здолела захапіць творчым працэсам і прысутную аўдыторыю, якая з ахвотай уключылася ў рыфмаванне паэтычных радкоў разам з аўтарам і цытаванне твораў са сваіх месцаў.
Презентацыя кнігі была прымеркаваная да 65-годдзя паэткі і пераўтварылася ў сапраўднае свята.
Віншаванні з нагоды выхада кнігі і дня нараджэння, кветкі і падарункі Валянціна Марчанка прымала ад кіраўніцтва раёна, сваіх калег па прафесіі і творчасці, гасцей свята.
У сваім звароце да Валянціны Аляксандраўны старшыня раённага Савета дэпутатаў А. А. Гоман адзначыла яе актыўную грамадзянскую пазіцыю, нястомнасць у працы і творчасці, інавацыйнасць ідэй і глыбокую любоў да сваёй працы, да Краснапольшчыны і Беларусі, якія сталі для Валянціны Аляксандраўны другой Радзімай. Радзімай, якую паэтка апявае ў сваёй паэтычнай творчасці, чым уносіць значны ўклад у духоўную скарбніцу Краснапольшчыны, у папулярызацыю роднага слова, мовы, роднага краю.
С. М. Петрачэнка, загадчыца сектарам культуры Краснапольскага райвыканкама, адзначыла, что Валянціна Марчанка не толькі апявае, але і глыбока любіць сваю Радзіму, што даказвае сваёй нястомнай працай на ніве культуры.
“Гэта пацвярджаюць вынікі яе прафесійнай і грамадскай дзейнасці, яе творчыя дасягненні, якія з’яўляюцца гонарам нашага раёна і нават рэспублікі. Сваёй працай і творчасцю Валянціна Аляксандраўна ўносіць значны ўклад у духоўнае багацце Краснапольшчыны. Той, хто ўжо знаёмы з яе паэтычнай творчасцю, упэўніўся, што ў кожным радку яе вершаў – часцінка яе душы, якая ўмее любіць, і якая адкрытая да ўсяго прыгожага ў жыцці”, - так адгукнулася аб паэтцы загадчыца сектарам культуры і пажадала, каб творчасць таленавітай зямлячкі і надалей упрыгожвала наш свет.
Многа цёплых водгукаў аб творчасці і працы прагучала ў адрас Валянціны Марчанка ад загадчыка сектарам ідэалагічнай работы і па справах моладзі Краснапольскага райвыканкама У. А. Піванава, дырэктара ГУК “ЦКС Краснапольскага раёна” Ю. П. Падалякіна, ад старшыні пярвічнай прафсаюзнай арганізацыі гэтай установы В. У. Юркінай, ад дырэктараў бібліятэчнай і музейнай устаноў раёна А. М. Раманенка і Л. М. Пшанічнікавай, ад клубных работнікаў сельскіх клубных устаноў у асобе В. І. Гомаравай, ад членаў народнага літаратурнага калектыву “Світанак” з вуснаў С. А. Сазонавай, ад рэдактара дзяржаўнай установы “Рэдакцыя газеты “Чырвоны сцяг. Краснаполле” Н. В. Козік.
“Вялікае дзякуй за цудоўныя хвіліны, падараваныя нам. Апынуцца ў святле Вашай паэзіі – празрыстай і чыстай – усё роўна, што напіцца вады. Яна лагодзіць сэрца і абуджае лепшыя пачуцці”, - адгукнулася В. І. Гомарава, і такіх прызнанняў ад наведвальнікаў сустрэчы было шмат.
Прэзентацыя кнігі прайшла ў цёплай атмасферы, бо ўдзельнікамі мерапрыемства былі тыя, у каго душа здольная адгуквацца на слова, умее радавацца поспехам сваіх землякоў і ганарыцца імі.
Мерапрыемства яшчэ раз упэўніла, што ўсё добрае ствараецца нераўнадушшам людзей, такіх, як наша таленавітая зямлячка Валянціна Марчанка.
Сіл, невычэрпнага энтузіазму Вам, Валянціна Аляксандраўна. Няхай Ваша душа застаецца поўнай крыніцай, няхай Вашы пачуцці працягваюць ліцца на паперу, а напісаныя Вамі паэтычныя радкі робяць акаляючы свет і нашы душы больш дасканалымі, чыстымі і светлымі.
АЛЕКСАНДРОВА В., метадыст РЦК ДУК "Цэнтралізаваная клубная сістэма Краснапольскага раёна"
