Свята першай баразны адбылося на Краснапольшчыне 30 сакавіка
Свята прайшло ў народнай традыцыі Краснапольшчыны, калі гучаць звароты да Бога аб бласлаўленні на добрую справу, просьбы, каб жыта ўрадзіла “коласам каласіста, а ядром ядраніста”, калі гаспадар “бярэ сявеньку і сее памаленьку”, калі ніўка корміцца-частуецца хлебам-соллю, каб потым абшчадрыла яна гаспадара сыццю, спорам і добрым здароўем.
У мерапрыемстве прынялі ўдзел старшыня Краснапольскага райвыканкама А. Л. Трушкін, старшыня адкрытага акцыянернага таварыства “Краснапольскае” С. Д. Ленкавец, аграном таварыства А. В. Васіленка, упраўляючы аддзялення “Краснапольскае” В. М. Бардонаў і механізатары аддзялення “Краснапольскае”.
А. Л. Трушкін, С. Д. Ленкавец, кінуўшы першыя зярняткі ў раллю, павіншавалі механізатараў з пачаткам сяўбы і выказалі надзею на добры ўраджай, бо для гэтага была закладзена добрая аснова намаганнямі спецыялістаў, працаўнікоў, былі ўкладзены неабходныя сродкі і падрыхтавана глеба і тэхніка.
Упрыгожылі свята звонкія галасы народнага ансамбля народнай песні “Шчадрэц” Краснапольскага раённага Цэнтра культуры. Галасы зліліся з гулам трактараў, і яны стварылі разам цудоўную песню, якая паляцела насустрач абуджэнню зямлі і зерню.
Валянціна Марчанка, метадыст РЦК ДУК “Цэнтралізаваная клубная сістэма Краснапольскага раёна”
