У Бялынічах у парку адпачынку «Ліпавы гай» прайшло народнае свята Купалле, якое падрыхтавалі спецыялісты раённага цэнтра культуры
У разгар лета ў Беларусі адзначаюць Купалле – адно з найстарадаўнейшых народных свят, прысвечаных сонцу і росквіту зямлі. Сёння ў свяце Купалля перапляліся не толькі народныя і хрысціянскія традыцыі, але і сучасныя. Дзякуючы гэтаму народныя святы выклікаюць цікавасць у моладзі, атрымліваюць новае даханне і працягваюць жыць.
Згодна з традыцыямі свята, бялынічане і госці горада актыўна ўдзельнічалі ў народных гульнях, гадалі, плялі купальскія вяночкі, вадзілі карагоды ля вогнішча. Усе прысутныя на свяце з цікавасцю сачылі за дзеяннямі, якія адбываліся на сцэне падчас тэатралізаванай канцэртнай праграмы. Разам з Купалінкай і Купалішом пераадольвалі перашкоды, што трапляліся на шляху пошуку купальскай кветкі. Людзей было шмат самага рознага ўзросту і ніхто не сумаваў у гэты напоўнены цудам вечар. Завяршылася свята маладзежнай дыскатэкай.
Людміла Куранкова, метадыст РЦК ДУК «ЦКС Бялыніцкага раёна».
