У новы год – з новымі поспехамі!
2022 год для Краснапольскага раёна пачаўся новымі дасягненнямі.
У міжнародным конкурсе-фестывалі мастацтваў “Мы вместе” народны фальклорны ансамбль “Горскія харашухі” атрымаў Гран-пры ў намінацыі “Музычна-тэатральная пастаноўка”, а ў намінацыі “Народны вакал” – дыплом лаўрэата III ступені.
На працягу 32 гадоў ансамбль “Горскія харашухі” з любоўю і адказнасцю ставіцца да захавання фальклорнай спадчыны сваёй малой радзімы, гэтага ўнікальнага нацыянальнага скарбу, створанага беларускім народам.
Дыплом лаўрэата I ступені міжнароднага конкурсу-фестывалю мастацтваў за аўтарскую творчую работу ўжо ў новым 2022 годзе атрымала Валянціна Марчанка, кіраўнік народнага аматарскага паэтычнага аб’яднання “Світанак” Краснапольскага раённага Цэнтра культуры.
Выніковым быў яе ўдзел у міжнародных паэтычных конкурсах на працягу мінулага 2021 года – яна атрымала 5 дыпломаў лаўрэата: 3 дыпломы I ступені і 2 дыпломы III ступені.
І вось 2022 год пачаўся новай перамогай.
“Мне прыемна, што такой высокай узнагародай адзначана мая работа, якая тэматычна скіравана на зберажэнне памяці, гістарычнай спадчыны нашага народа, да чаго заклікае ідэя 2022 года – Года гістарычнай памяці”, - дзеліцца аўтар.
Паэтка Краснапольшчыны піша на двух мовах – рускай і беларускай, але найбольш – на беларускай. Менавіта беларускамоўныя яе вершы гучаць сакавіта, пявуча і кранальна, дыхаюць любоўю да роднай зямлі і роднай мовы.
В. Аляксандрава, вядучы метадыст ДУК “Цэнтралізаваная клубная сістэма Краснапольскага раёна”
