Важнасць адраджэння страў традыцыйнай беларускай кухні
Сённяшняе грамадства ўсё больш адчувае патрэбу ў вяртанні да сваіх каранёў, у адраджэнні культурнай спадчыны. Традыцыйная беларуская кухня – гэта не толькі смачная ежа, але і частка нашай гісторыі, культуры і ідэнтычнасці. Менавіта таму сустрэча з Маненок Раісай Міхайлаўнай у агрогарадку Долгае стала важным крокам у захаванні і папулярызацыі нашых гастранамічных традыцый.
У рамках мерапрыемства, арганізаванага творчымі работнікамі Долгаўскага клуба-бібліятэкі, у складзе групы былі метадыст Вароніч Ірына Анатольеўна і загадчыца аддзела нестацыянарнага абслугоўвання насельніцтва Ачыновіч Жанна Яўгенаўна. Яны наведалі Раісу Міхайлаўну, каб даведацца пра цікавыя сямейныя рэцэпты, якія перадаюцца з пакалення ў пакаленне.
Гаспадыня падзялілася сакраментамі прыгатавання галушак з таркаванай бульбы. Гэта простая, але вельмі смачная страва, якая патрабуе толькі некалькіх інгрэдыентаў: бульбы, малака і трохі часу. Натаркаваная бульба, злёгку адціснутая, ператвараецца ў маленькія шарыкі, якія варыліся ў вадзе, а потым туды дадавалася малако. А калі галушкі абсмажыць на патэльні з цыбуляй і маслам, то гэта становіцца сапраўдным далікатэсам.
Аднак гэта быў не адзіны рэцэпт, які мы даведаліся. Раіса Міхайлаўна таксама распавяла пра прыгатаванне бліноў на дражджавой заквасцы з таркаванай бульбы, смажаных “вушак” з пшанічнай мукі і куляшу. Таксама прысутныя даведаліся, што мачанка была не толькі з салам і каўбасой, але і з рыбай. Кожны з гэтых рэцэптаў не толькі смачны, але і насычаны гісторыяй, якая адлюстроўвае жыццё беларусаў у мінулым. Раіса Міхайлаўна падзялілася шматлікімі цікавымі гісторыямі з свайго жыцця, што дазволіла нам больш глыбока зразумець значэнне гэтых страў у яе сямейным жыцці.
Адраджэнне страў традыцыйнай беларускай кухні мае вялікае значэнне для захавання нашай культурнай спадчыны. Гэта не толькі вяртанне да смакаў мінулага, але і магчымасць падзяліцца гэтымі ведамі з будучымі пакаленнямі. Кожны рэцэпт – гэта частка нашай нацыянальнай самасвядомасці, якая павінна быць захавана і перададзена далей.
Такія мерапрыемствы, як сустрэча з Раісай Міхайлаўнай, дапамагаюць нам не толькі навучыцца гатаваць смачныя стравы, але і зразумець, наколькі важна захоўваць нашу культурную спадчыну. Адраджэнне беларускай кухні – гэта шлях да самапазнання і ўмацавання нацыянальнай ідэнтычнасці.
Ж.Я.Ачыновіч, загадчык аддзела нестацыянарнага абслугоўвання ДУК “Цэнтралізаваная клубная сістэма Клічаўскага раёна”
