Яркія эмоцыі і талент на сцэне: у Бабруйску праходзіць другі конкурсны прагляд абласнога агляду-конкурсу аматарскіх тэатральных калектываў
Абласны агляд-конкурс аматарскіх тэатральных калектываў “У далонях маёй Беларусі” працягвае радаваць яркімі пастаноўкамі. Другі конкурсны прагляд, які праходзіць на базе ДУК “Палац мастацтваў г.Бабруйска”, стаў сапраўдным святам тэатральнага мастацтва, прадэманстраваўшы высокі ўзровень майстэрства і бязмежную адданасць любімай справе ўдзельнікаў.
У гэты дзень на суд журы і гледачоў былі прадстаўлены 12 пастановак ад аматарскіх тэатральных калектываў з Бабруйска, Бабруйскага, Глускага, Кіраўскага, Клічаўскага і Асіповіцкага раёнаў. Разнастайнасць жанраў і тэматык уражвае ўяўленне: удзельнікі прадставілі казкі, літаратурна-музычныя кампазіцыі, беларускую драматургію, сучасную класіку. У 2025 годзе абласны агляд-конкурс прысвечаны 80-годдзю Перамогі савецкага народа ў Вялікай Айчыннай вайне. Таму гэтая тэма таксама была адлюстравана ў пастаноўках.
Ацэньваючы выступленні калектываў, члены журы адзначылі высокі ўзровень прафесіяналізму ўдзельнікаў, іх адданасць тэатру і любоў да сваёй справы. Было падкрэслена, што абласны агляд-конкурс з’яўляецца важнай падзеяй у культурным жыцці Магілёўскай вобласці, якая садзейнічае развіццю аматарскага тэатральнага мастацтва і выяўленню новых талентаў.
Наперадзе яшчэ адзін конкурсны прагляд, які адбудзецца ўжо заўтра, 27 лютага, на базе ДУК “Цэнтралізаваная клубная сістэма Чэрыкаўскага раёна”. А 20 сакавіка адбудзецца фінал і падвядзенне вынікаў, дзе вызначацца пераможцы абласнога агляду-конкурсу аматарскіх тэатральных калектываў. Але ўжо зараз можна з упэўненасцю сказаць, што гэты конкурс стаў сапраўдным святам тэатра, які падараваў гледачам незабыўныя эмоцыі і яркія ўражанні.
Крысціна Башарымава, вядучы рэдактар установы культуры “Магілёўскі абласны метадычны цэнтр НТ і КАР”
