На Краснапольшчыне адбыўся IV рэгіянальны фестываль народных промыслаў і рамёстваў “Краснапольскі глечык”
28 жніўня на Краснапольшчыне адбыўся IV рэгіянальны фестываль народных промыслаў і рамёстваў “Краснапольскі глечык”. Ён, не гледзячы на пахмурнае і даждлівае надвор’е, сабраў нямала і сапраўдных майстроў, і тых, хто толькі далучаецца да сакрэтаў рамяства і дэкаратыўна-прыкладной творчасці.
Цікаўнасць да народнай творчасці наведвальнікаў фестывалю змаглі задаволіць майстры з Касцюковіцкага, Чэрыкаўскага, Клімавіцкага, Слаўгарадскага, Краснапольскага раёнаў Магілёўскай вобласці.
Адкрываючы фестываль, старшыня Краснапольскага райвыканкама А. Л. Трушкін падкрэсліў значэнне лепшых традыцый народнай творчасці ў захаванні самабытнасці беларускага народа, пажадаў майстрам і надалей уносіць пасільны ўклад у развіццё культуры свайго рэгіёна і краіны, а фестывальным сустрэчам набываць свае рысы і традыцыі.
Трэба адзначыць, што рамесны фестываль на Краснапольшчыне сапраўды працягвае набываць свае рысы. Адна з іх – шырокая магчымасць на працягу дзейства знаёміцца з асаблівасцямі рамёстваў і майстрамі, што забяспечваецца прадумана распрацаваным сцэнарыем і добрай работай вядучых. У майстроў бярэцца інтэрв’ю, яны публічна дзеляцца сакрэтамі і засвоенымі тэхналогіямі свайго рамяства, дэманструюць працэсы для гледачоў і вядуць прафесійныя гутаркі паміж сабой. Наведвальнікі фестывалю знаёмяцца не толькі з геаграфіяй удзельнікаў, але і з відамі рамёстваў і ДПМ, імёнамі майстроў, што добра пашырае круг сяброў і аднадумцаў, стварае камфортную атмасферу фестываля.
На фестывалі пад суправаджэнне песенных выступленняў салістаў і калектываў ёсць магчымасць жадаючым паўдзельнічаць у майстар-класах, прыгледзіць и выбраць тавар, як на сапраўдным кірмашы, зрабіць заказ на выраб. А майстрам – абмяняцца вопытам і даведацца пра новыя матэрыялы і тэхналогіі на ўласныя вочы. Такую магчымасць даваў і конкурс фестывалю “Рамёствы ў фармаце сучаснасці”. Пераможцамі ў ім сталі: Крыўцова Л. Г., майстар па кераміцы з Клімавіцкага раёна (дыплом I ступені), Лабыка С. М., майстар тэкстыльнай лялькі з Касцюковіцкага раёна (дыплом II ступені), Курлукова Т. М., майстар з Клімавіцкага раёна, якая адных ўразіла, а ў другіх выклікала пачуццё настальгіі сваёй калекцыяй лялек з ваты (дыплом III ступені).
Традыцыйны жа конкурс фестывалю на Краснапольшчыне – конкурс “Незабытыя рамёствы”. Ён накіраваны на падтрымку і стымуляванне засваення традыцыйных народных тэхнік і, канешне, на ўдасканаленне майстэрства. Пераможцамі ў гэтым конкурсе сталі: Талейка В. Ул., майстар па мастацкай апрацоўцы драўніны са Слаўгарадскага раёна (дыплом I ступені), Сапажкова Т. М., майстар Клімавіцкага РДР, Давыдаў В. І., майстар Касцюковіцкага РДР.
Яшчэ адным конкурсам стаў конкурс па вырабу сімвала фестывалю – глечыка – толькі з самых розных матэрыялаў, з якімі працуюць майстры. Так з’явіліся глечыкі плеценыя з лазы, вырабленыя з джута, вышытыя на тканіне і іншыя. За адлюстраванне сімвала фестывалю былі адзначаны: Камісараў І. Я., майстар з Чэрыкаўскага раёна (дыплом I ступені), Самкнулава К. М., вышывальшчыца са Слаўгарадскага раёна (дыплом II ступені), Кандраценка А. Ул., з Краснапольскага раёна, якая дасканала валодае пляценнем з газетнай лазы (дыплом III ступені).
На жаль, на фестывалі з прыгожай назвай “Краснапольскі глечык” так і не прыйшлося ўбачыць, як круціцца ганчарны круг і на вачах нараджаецца той самы адметны краснапольскі глечык з чырвонае гліны. Негледзячы на значны крок у адраджэнні традыцый ганчарства на Краснапольшчыне праз рэалізацыю адпаведнага праекта і адкрыццё ганчарнай майстэрні, на сённяшні дзень Краснапольшчына яшчэ не можа пахваліцца асартыментам традыцыйных для Краснапольскага раёна гліняных вырабаў – добра вядомымі глінянымі глечыкамі, макатрамі, куўшынамі, гарлачамі, махоткамі і іншымі. З імі знаёмства пакуль адбываецца праз выстаўкі ганчарных экспанатаў мясцовага музея і этнахатак, створаных пры СДК. А работа з глінай у майстэрні абмяжоўваецца пакуль толькі лепкай рукамі гліняных сувеніраў.
Каб не згубіць традыцый продкаў трэба тварыць, не спыняцца на дасягнутым і шукаць шляхі і сродкі рашэння праблем. Таму лагічна фестываль “Краснапольскі глечык” завяршыўся круглым сталом “Праблемы рамесніцтва і шляхі іх рашэння”.
Валянціна Марчанка, метадыст РЦК ДУК “Цэнтралізаваная клубная сістэма Краснапольскага раёна”
