ЗАПРАШАЕМ НА СУСТРЭЧУ З “КАЛЯДНЫМ ЦУДАМ”!
Раённы конкурс рамёстваў і ДПМ “Калядны цуд”, які стаў традыцыйным для краснапольскіх прыхільнікаў рукатворнай дзейнасці, зноў адбыўся на Краснапольшчыне і сапраўды падарыў нямала цудоўных уражанняў і цудаў. Да гэтых цудаў можна дакрануцца і душой, і рукой, і вачыма. А зрабіць гэта можна праз выстаўку ў раённым Центры культуры г. п. Краснаполле, якая будзе працаваць ажно да 19 студзеня 2025 года!
ЧЫМ ЗДЗІВІЎ КОНКУРС “КАЛЯДНЫ ЦУД”?
Конкурс у гэтым годзе па-сапраўднаму здзівіў разнастайнасцю работ і матэрыялаў, рознымі творчымі задумамі, але, у першую чаргу, здзівіў і парадаваў засваеннем краснапольскімі аматарамі творчасці новага для многіх віду рамяства – вырабамі з ваты. Здаецца, усё так проста – вата, клей, краскі…
У выніку ж – нельга адарвацца на выстаўцы ад навагодняга дрэва, упрыгожанага гэтымі ватнымі цацкамі. У сваёй большасці - гэта чалавечыя фігуркі. І ў кожнай з іх – свой характар, свае эмоцыі, свая гісторыя. Разглядаць іх можна гадзінамі.
Хто ж яны, гэтыя майстры, якія так здзівілі, парадавалі нас і многім прадаставілі магчымасць вярнуцца ў далёкае ўжо дзяцінства, калі цацкі з ваты былі ў “модзе”?
Больш за два дзясяткі лялек з ваты за кароткі час змаглі зрабіць майстры раённага Дома рамёстваў Андрыянава Вольга Валянцінаўна і Кузьмянкова Іна Уладзіміраўна. Дасканаласці іх работ можна здзіўляцца бясконца. Не так даўно гэтыя майстры яшчэ толькі ўпершыню пазнаёміліся з тэхналогіяй работы з ватай цераз майстар-клас, арганізаваны УК “Магілёўскі абласны метадычны цэнтр народнай творчасці і культурна-асветнай работы”, і вось ужо атрымаўся цудоўны вынік.
Не менш здзівіла і яшчэ адна ўдзельніца конкурсу з ліку насельніцтва Краснаполля – гэта Маслава Ганна Васільеўна. Яна працуе ў дзяржаўнай лесагаспадарчай установе “Краснапольскі лясгас”, з’яўляецца начальнікам бюро па ахове працы, але свой вольны час прысвячае творчасці. Яна з задавальненнем наведвае выстаўкі, цікавіцца тэхналогіямі розных відаў творчасці і спрабуе іх засвоіць.
“Дзе б я не была - на святах, выстаўках, у гасцях, імкнуся нешта сфатаграфаваць, распытаць, купіць для ўзору. А потым спрабую сама разабрацца і нешта зрабіць. Апошняе маё захапленне – ватныя лялькі”, - расказвае Ганна Васільеўна. І яна адна з першых прапанавала для ўдзелу ў конкурсе дзясатак вырабаў з ваты, якія па якасці і прыгажосці амаль не саступаюць сапраўдным майстрам.
АСАБЛІВАСЦІ КОНКУРСУ.
Якія яшчэ асаблівасці конкурсу падаюцца добрымі і пацвярджаюць такія яго мэты, як стымуляванне да творчасці, удасканальванне майстэрства, захаванне традыцый? Сярод такіх асаблівасцей - і кантынгент удзельнікаў, і якасць работ, і разнастайнасць тэхналогій і матэрыялаў.
Як заўсёды актыўны ўдзел у конкурсе прынялі клубныя ўстановы: клубныя фарміраванні на іх базе і іх кіраўнікі.
Добраякасныя работы прадставілі на конкурс клубныя фарміраванні Яноўскага, Ленінскага, Горскага СДК, Казельскага СК.
Самай багатай стала намінацыя з такой ж назвай, як і сам конкурс, - “Калядны цуд”. Нямала па-сапраўднаму цудных вобразаў сімвала 2025 года з выкарыстаннем розных матэрыялаў і тэхнік прадставілі ўмелыя на ўсе рукі канкурсанты.
Людміла Віктараўна Крапіўніцкая, культработнік Яноўскага СДК, яна ж кіраўнік гуртка па ДПМ “Чараўніцы”, засталася верная свайму матэрыялу – простым лістам кукурузы. Але ж як дасканала і прыгожа выглядалі яе Змеі! Праўду сказаць, на выставу трапіла толькі адна. “Чаму?, - спытаеце вы. Дык разабралі, раскупілі іх на сувеніры яшчэ на прыступках!
Алена Ўладзіміраўна Кандраценка, кіраўнік гуртка Ленінскага СДК, стварыла сімвал года Змяю ў тэхніцы пляцення з газетнай лазы. Работа атрымала проста шыкоўнай! Як і ў Людмілы Ўладзіміраўны Васільковай, кіраўніка гуртка Горскага СДК.
Майстар РДР Маскалькова Валянціна Валянцінаўна стварыла сапраўдны цуд з залатой саломкі нашых палёў.
НАВЕДАЙЦЕ НАШУ ВЫСТАВУ!
На жаль, немагчыма расказаць пра ўсе 85 конкурсных работ, якія адабраныя журы для выстаўкі. Абавязкова наведайце яе. Выстаўка “Калядны цуд” размяшчаецца ў фае РЦК, у так званым “Офісе Дзеда Мароза”. Тут вас чакаюць яшчэ і прыгожыя фотазоны.
Вынікі конкурсу будуць падведзены 16 студзеня тут жа, у фае РЦК, у 10 гадзін у час семінара для клубных работнікаў.
А 23 студзеня будзе працаваць метадычная пляцоўка па вывучэнню, засваенню і папулярызацыі рамёстваў і ДПМ у дзейнасці клубных устаноў, дзе акрамя розных пытанняў па тэме адбудзецца і майстар-клас па рабоце з саломкай, на які мы запрашаем усіх жадаючых. Скарыстайце такую магчымасць, узбагаціце свет свайго жыцця!
Валянціна Марчанка, метадыст РЦК ДУК “Цэнтралізаваная клубная сістэма Краснапольскага раёна”
